په‌رله‌مانێ‌ كوردستانێ‌: ل ڤان رۆژان دێ‌ ده‌ست ب مامه‌لێن تاپۆكرنا خانیێن زێده‌گاڤی هێته‌ كرن

..........................

ئه‌ندامه‌كێ لیژنه‌یا شاره‌وانی ل په‌رله‌مانێ كوردستانێ راگه‌هاند، وه‌لاتی دشێن ب رێكا كارگێریێن ده‌ڤه‌را خوه‌ داخوازه‌كێ پێشكێش بكه‌ن ژ بۆ تاپۆكرنا وان خانیێن ب شێوێ زێده‌گاڤی هاتینه‌ درستكرن و رێنمایێن نوو یێن تاپۆكرنا خانیان ژێ دگرن.

نزار مه‌لا غه‌فار بریارده‌رێ لیژنه‌یا شاره‌وانی و گه‌شوگوزار ل په‌رله‌مانێ كوردستانێ راگه‌هاند: "یاسایا ب ناڤكرنا خانیێن زێده‌گاڤی ژماره‌ ٣ یا سالا ٢٠١٩ێ نها ل هه‌رێما كوردستانێ به‌ركاره‌ و وه‌لاتی دشێن مامه‌لێن خوه‌ بۆ تاپۆكرنا وان خانیێن كو ب زێده‌گاڤی ل سه‌ر ئه‌ردێ حكوومی هاتینه‌ درستكرن برێڤه‌ببه‌ن، دا كو ده‌ستهه‌لاتا كارگێری یا ده‌ڤه‌را وی ب وه‌رگرتنا رێكارێن یاسایی ژ بۆ كارۆبارێن وه‌لاتی رابن.

ناڤبری هه‌روه‌ها راگه‌هاند: "رێكارێن ب ناڤكرنا خانیێن زێده‌گاڤی ب پێكئینانا لیژنه‌یه‌ك هه‌ڤبه‌ش دێ هێته‌ ئه‌نجامدان كو دێ ژ لایێ یه‌كه‌یێن كارگێری كو نوونه‌رێ شاره‌وانیێ و پۆلیس و چه‌ند لایه‌نه‌كێن دی ب خوه‌ڤه‌ گریت، ئه‌ڤه‌ ژی دێ ل گۆره‌ی ده‌ڤه‌ران هێته‌ گوهۆرین".

ئاماژه‌ ب ڤێ چه‌ندێ ژی دا كو: "پێدڤیه‌ د ده‌مه‌كێ‌ دیاركری دا هه‌موو ئه‌و خانیێن ب شێوه‌یێ زێده‌گاڤی هاتینه‌ درست كرن بهێنه‌ تاپۆكرن، ژ به‌ر كو پشتی ڤی ده‌می كار ب ڤێ یاسایێ ناهێته‌ كرن وه‌كو د ماده‌یا ١٢ یا یاسایێ دا هاتیه‌، ب ڤی ره‌نگی ٢٥٠ هه‌تا ٣٠٠ هزار خانی ل هه‌موو كوردستانێ دێ هێنه‌ تاپۆكرن و رێژه‌یه‌كا زۆر ژ وه‌لاتیان دێ مفادار بن".