چوار رێڤه‌به‌ريێن مه‌زن دێ‌ ل سنوورێ‌ باژێرڤانیا ته‌ناهیێ‌ هێنه‌ دانان


سه‌رۆكێ‌ باژێرڤانیا ته‌ناهیێ‌ راگه‌هاند، كۆمه‌لگه‌ها ته‌ناهی پێشڤه‌چوونێن مه‌زن بخۆڤه‌ دگریت و هه‌تا نها هژماره‌كا رێڤه‌به‌ریێن مه‌زن و گرنگ ل ده‌ڤه‌رێ‌ هاتینه‌ دانان و هنده‌كێن دی ژی دێ‌ ژ نوو هێنه‌ دانان.

نزار نێچیرڤان، سه‌رۆكێ‌ باژێرڤانیا ته‌ناهیێ‌ دیار كر، ژ به‌ر نه‌مانا ئه‌ردی ل سه‌نته‌رێ باژێرێ دهوكێ دا، به‌رێ خه‌لكی پتر كه‌فتیه‌ ته‌ناهیێ و هژماره‌ك ژ رێڤه‌به‌ریێن میری ل ڤی ده‌ڤه‌را ته‌ناهیێ‌ هاتینه‌ درست كرن، وه‌كو رێڤه‌به‌ریا پۆلیسێن پارێزگه‌ها دهۆكێ و رێڤه‌به‌ریا ئاسایشا پارێزگه‌ها دهۆكێ، ئه‌ڤه‌ ژ بلی كو د ده‌مه‌ك نێزیكدا بریاره‌ رێڤه‌به‌ریا پاسپۆرتان و رێڤه‌به‌ریا ئاكنجیبوونێ‌ و رێڤه‌به‌ریا ره‌گه‌زنامێ‌ ژی ل سنۆرێ ڤێ باژێرڤانیێ هێنه‌ دروستكرن، هه‌روه‌ها چه‌ندین پرۆژه‌یێن ئاكنجیكرنێ‌ دكه‌ڤنه‌ سنۆرێ ڤێ باژێرڤانیێ، وه‌كو پرۆژێ ئه‌ڤرۆ ستی و نارۆ ستی.

ل گۆر ئاخفتنا نزار نێچیرڤان سه‌رۆكێ باژێرڤانیا ته‌ناهیێ ژبه‌ر نه‌بوونا بۆدجه‌كا تایبه‌ت، هه‌تتا نها نه‌شیایه‌ چو پرۆژه‌یێن مه‌زن جێبه‌جێ بكه‌ت، به‌لكو ب تنێ ل سه‌ر پێشینا هه‌یڤانه‌ یا باژێرڤانیێ هنده‌ك پرۆژه‌یێن بچووك وه‌كو تێكه‌له‌كرنا هنده‌ك جاده‌یێن ناڤخۆ و درستكرنا سۆلینێن ئاڤێ دهێنه‌ دروستكرن.

سه‌رۆكێ باژێرڤانیا ته‌ناهیێ ئه‌ڤ یه‌ك ژی ته‌كه‌ز كر كو د پلانا وان دایه‌ پاركه‌كێ كو جهێ یاریێن زارۆیان ژی تێدا هه‌بیت ل ته‌ناهیێ درست بكه‌ن، هه‌روه‌ها هه‌ژماره‌كا پرۆژه‌یان پێشنیار كرینه‌ و ڤه‌دیتنا وان دروست كریه‌ و ل هیڤیا دیاركرنا بۆدجه‌یه‌كێ تایبه‌تن ژ بۆ جیبه‌جیكرنا وان پرۆژان ل باژێرڤانیا ته‌ناهیێ.

باژێرڤانییا ته‌ناهیێ، باژێرڤانیه‌كه‌ دكه‌ڤیته‌ رۆژئاڤایێ سه‌نته‌رێ باژێرێ دهوكێ، ده‌ڤه‌را ته‌ناهیێ ل سالێن نوتان دا ژ بۆ وان خێزانێن ئاواره‌ یێن ژ ئیرانێ ڤه‌گه‌ریاین هاتبوو درستكرن ژ لایێ حكوومه‌تا هه‌رێما كوردستانێ ڤه‌. پشتی به‌رفره‌هبوونا سنۆرێن ڤی باژێری ل سالا ٢٠٠١ باژێرڤانی لێ هاته‌ دامه‌زراندن، ئه‌ڤه‌ ژی بۆ سه‌ده‌م هه‌ژماره‌كا زێده‌تر ژ خه‌لكی به‌رێ خوه‌ بده‌نه‌ ڤێ كومه‌لگه‌هێ نها وه‌كو تاخه‌ك ژ باژارێ دهۆكێ لێهاتیه‌.