رێڤەبەرێ کارگەها جوداکرنا گلێشی ل کواشێ هاتە گوهرین

ـــــــــــــــــــــــــــــــــــــــــــــــــــــــــــــــــــــــــــــ
ب مەرەما باشتر خزمەتکرنا خەلکێ دەڤەرێ و کاری، ب بەرهەڤبوونا هەرئێک ژ ئەیسەر جەرگیس، قایمقامێ قەزا سێمێلێ ب وەکالەت و دیار بەحری رەسول، رێڤەبەرێ گشتیێ باژێرڤانیان ل پارێزگەها دهۆکێ، ئەڤرۆ سپێدێ د رێورسمەکێ دا، رێڤەبەرێ کارگەها جوداکرنا گلێشی ل کواشێ بۆ رێڤەبەریا گشتی یا باژێرڤانیان هاتە ڤەگوهاستن و ل جهێ وی رێڤەبەرەکێ نوو هاتەدانان.

دیار بەحری رەسول، رێڤەبەرێ گشتیێ باژێرڤانیان ل پارێزگەها دهۆکێ د دچارچوڤێ رێورسمێن گوهرینا رێڤەبەرێ کارگەها جوداکرنا گلێشی ل کواشێ گۆت: (گورانکاری ل رێڤەبەری و سازیێن میری، گورانکاریێن سرۆشتی و کارگێری نە، مەرەم باشتر خزمەتکرنا وەلاتیان و کاری یە، ل ڤێرە ب فەردبینم کو سوپاسیا رێڤەبەرێ بەرێ یێ کارگەها جوادکرنا گلێشی ل کواشێ "ئیسماعیل سەعدی" بکەم کو ددەما بوری دا شیایە خزمەتەکا باش بکەت، دیسان داخوازا سەرکەفتنێ ژی بۆ رێڤەبەرێ نوو "حازم عەبدی" دکەین و دخوازین سەرکەفتی بیت و پشتەڤانیا خوە ژی بۆ دوپات دکەین).

ژلایێ خوڤە حازم عەبدی، رێڤەبەرێ نوو یێ کارگەها جوداکرنا گلێشی ل کواشێ گۆت: (سوپاسیا رێڤەبەریا گشتی یا باژێرڤانیان ل پارێزگەها دهۆکێ دکەین کو ئەو باوەریی دایە مە و دەستنیشانکرین وەکو رێڤەبەرێ نوو ل کارگەها ناڤبری، ئومێدەوارین بشێن کارەکێ جوان و باش بۆ خەلکێ دەڤەرێ و بزاڤا کاری ل کواشێ بکەین ب تایبەتی د چارەسەرکرنا گلێشی دا).

دهێتە زانین کو کارگەها جوداکرنا گلێشی ل کواشێ، دکەڤیتە گوندێ کواشێ یا سەر ب قەزا سێمێلێ و پێکدهێت ژ دوو کارگەهان، گلێشێ دهۆک و دەورۆبەر وەردگریت و ژێکجودا دکەت.