(پرۆسەیا دابەشکرنا پارچە زەڤیان بۆ کەسوکارێن شەهیدان ب گورەی شیان دێ بەردەوام بیت)
ــــــــــــــــــــــــــــــــــــــــــــــــــــ
وه‌كو رێزگرتن بۆ خوینا شه‌هیدان، ئێڤاریا ئه‌ڤرۆ رێڤه‌به‌رێ گشتیێ باژێرڤانیان ل پارێزگه‌ها دهۆكێ ژ نێزیك سه‌ره‌دانا چایخانا شه‌هیدان ل بازارێ دهۆكێ كر، ژلایێ خودانێن چایخانێ هاتنه پێشوازیكرن و دیاركر كو كه‌سوكارێن شه‌هیدان ژ هه‌ژى ژیانه‌كا باشترن و وه‌كو رێڤه‌به‌ریا گشتى یا باژێرڤانیان ل گه‌ل جهێن شوله‌ژێ چه‌ندین پارچه زه‌ڤى ل سه‌ر كه‌سوكارێن وان دابه‌شكرینه و پرۆسه‌یا دابه‌شكرنێ ژى ب گوره‌ى شیان یا به‌رده‌وامه.
دیار به‌حرى ره‌سول، رێڤه‌به‌رێ گشتیێ باژێرڤانیان ل پارێزگه‌ها دهۆكێ دچارچوڤێ سه‌ره‌دانا خوه دا بۆ چایخانا شه‌هیدان دیاركر كو شه‌هیدێن كوردستانێ جهێ رێزگرتنێ نه و پێدڤى یه خزمه‌ته‌كا به‌رچاڤ بۆ كه‌سوكارێن وان بهێته‌كرن و گۆت: (ده‌ستخوشیێ خودانێ چایخانا شه‌هیدان دكه‌ین كو ل سه‌ر ئه‌ركێ خوه شیاینه وێنه‌یێن هه‌موو شه‌هیدێن شه‌رێ داعش ل گه‌ل هنده‌ك ژ كه‌لوپه‌لێن وان كوم بكه‌ت داكو هه‌رده‌م ل بیرا خه‌لكى بیت و قوربانیدانا وان بۆ بزاڤا رزگاریخوازیا كوردستانێ نه‌هێته ژبیركرن، ئه‌ڤه زێده‌بارى كومكرن و هه‌لاویستنا وێنه‌ێن هنده‌ك ژ سه‌ركرده و شه‌هیدێن كه‌ڤن).
زێده‌تر گۆت: (وه‌كو رێڤه‌به‌ریا گشتى یا باژێرڤانیان ل پارێزگه‌ها دهۆكێ ل گه‌ل سازیێن دى یێن په‌یوه‌ندیدار دده‌ما بورى دا هژماره‌كا زۆر یا پارچه زه‌ڤیان ل سه‌ر كه‌سوكارێن شه‌هیدێن شه‌رێ داعش دابه‌شكرینه، ب گوره‌ى شیان دێ پرۆسه‌یا دابه‌شكرنا پارچه زه‌ڤیان یا به‌ردوام بیت هه‌تاكو هه‌موو كه‌سوكارێن شه‌هیدان پارچه زه‌ڤیان وه‌ربگرن، ژبه‌ركو كه‌سوكارێن شه‌هیدان ژ هه‌ژى ژیان و خزمه‌ته‌ك باشترن و ئه‌ركێ حوكمه‌ت و جهێن شوله‌ژێ یه هه‌موو هه‌ول و بزاڤان بۆ باشتركرنا ژیانا وان بكه‌ت).
دهێته زانین كو ل سنوورێ پارێزگه‌ها دهۆكێ نێزیكێ 640 شه‌هید ل شه‌رێ داعشێ داینه و دبیته پشكا شێرى ل كوردستانێ، چایخانا شه‌هیدان وه‌كو ئه‌ركه‌كێ نیشتمانى و مرۆڤایه‌تى، ب مه‌ره‌ما رێزگرتن ل خه‌بات و قوربانیدانا وان وێنه‌یێن هه‌موو شه‌هیدان ل چایخانا خوه كومكرینه.
.
