ب مه‌ره‌ما رێكخستنه‌كا باشتر بۆ كاروبارێن كارگه‌ه و كومپانیێن ده‌ڤه‌را كواشێ، بریاره، ل سالا 2020 ب شێوازه‌كێ باشتر رێڤه‌به‌ریا گشتی یا باژێرڤانیان ل پارێزگه‌ها دهۆكێ هه‌ڤكاری ل گه‌ل جهێن شوله‌ژێ، پێداچۆنێ د گرێبه‌ستان دا بكه‌ت، ژ به‌ر كو ژ سه‌رجه‌مێ 187 كارگه‌ه و كومپانیان، نێزیكی 60 ژ وان ل سه‌ر كارێن خوه به‌رده‌وامن.
سه‌هیم بامه‌ڕنی، رێڤه‌بهرێ گرێبه‌ستان ل رێڤه‌به‌ریا گشتی یا باژێرڤانیان ل پارێزگه‌ها دهۆكێ گۆت: (نوكه ل ده‌ڤه‌را كواشێ 187 كارگه و كومپانیێن جودا هه‌نه، ژ وانان 52 موله‌ت ژلایێ رێڤه‌به‌ریا گشتی یا وه‌به‌رهێنانێ ل پارێزگه‌ها دهۆكێ بۆ هاتینه دان و 135 ژی موله‌ت ژلایێ پێشه‌سازیا دهۆكێ بۆ هاتیه دان، به‌لێ هه‌موو كار و چالاكیێن وان ژلایێ سه‌رۆكاتیا باژێرڤانیا سێمێلێ یا سه‌ر ب رێڤه‌به‌ریا گشتی یا باژێرڤانیان ل پارێزگه‌ها دهۆكێ دهێنه سه‌رپه‌رشتیكرن، ژ به‌ر كو ل سه‌ر مولكێن باژێرڤانیا سێمێلێ هاتینه چێكرن، ئه‌ڤ كومپانی و كارگه‌هه ب گۆره‌ی یاسا و رێنمایێن تایبه‌ت كارێن خوه دكه‌ن).
زێده‌تر گۆت: (دا كو ئه‌ڤ هه‌موو كارگه و كومپانیه ب شێوازه‌كێ باشتر و رێكخستی كارێن خوه بكه‌ن و كارتێكرنێ ل ژینگه‌ه و ساخله‌میا وه‌لاتیان نه‌كه‌ن، لیژنه‌كا هه‌ڤپشك ب مه‌ره‌ما دووڤچوون ل سه‌ر كارێن وان هاتیه پێكئینان، ژ نێزیك سه‌ره‌دانا هه‌موو كارگه و كومپانیان كریه، ب رێیا باژێرڤانیا سێمێلێ دێ گرێبه‌ستێن نوو بۆ هێنه درۆستكرن، ژ به‌ر كو ژ كوما 187 وان كارگه‌ه و كومپانیان نێزیكی 60 كارگه‌ه و كومپانی ل سه‌ر كارێن خوه به‌رده‌وامن و ئه‌ڤێن دی هه‌موویان كارێن خوه راگرتینه و هنده‌كان ژی ژبه‌ر كاودانێن دارایی و ئابووری نه‌شیاینه كارێن خوه ب دووماهی بینن، د سالا نوو دا، دێ پێرابوون به‌رامبه‌ری سه‌ده‌مێن راگرتنا كاری و ئاینده‌یێ وان هێنه وه‌رگرتن).
د درێژاهیا ئاخفتنێن خودا دیاركر ژی، ژبلی كارگه‌ه و كومپانیێن موله‌تدای بۆ كاری و ب شێوازه‌كێ توماركری، هه‌ڤده‌م نێزیكێ 50 كارگه‌ه و پازرینگه‌هێن نه قانونی ژی ل ده‌ڤه‌را كواشێ هه‌نه و ب زێده‌گاڤی هاتینه چێكرن و ل چه‌ند رۆژێن بوری هژماره‌ك ژ وان ب بریارا سه‌رۆكێ حوكمه‌تا هه‌رێما كوردستانێ هاتنه‌گرتن و زێده‌تر گۆت: (چێكرنا هژماره‌كا كارگه‌ه و كومپانیان ل كواشێ بوویه ئه‌گه‌ر كارتێكرنێن نه‌رێنی ل سه‌ر ژینگه‌ه و ساخله‌میا وه‌لاتیان بكه‌ت،
ده‌رئه‌نجامێن وان ژی چه‌ند رۆژێن بۆری ب رێیا راپۆرته‌كا ناسا هاته شرۆڤه‌كرن، بزاڤ دهێنه‌كرن ل ده‌ستپێكێ لژنه‌كا تایبه‌تمه‌ند بهێته پێكئینان، پاشان ژ نێزیك سه‌ره‌دانا وان بكه‌ن و چاره‌سه‌ریێن پێدڤی بۆ وان ببینن دا كو ئێدی مه‌ترسی ل سه‌ر ژیانا وه‌لاتیێن پارێزگه‌ها دهۆكێ ب گشتی و وان كه‌سان ب تایبه‌تی درۆست نه‌بیت ئه‌ڤێن كو ل وان كارگه‌هان كاردكه‌ن كو هژمارا وان نێزیكێ دو هزار ئه‌ندازیار و ته‌كنیكار و كرێكارن، دیسان وان خێزانان ژی درۆست نه‌بیت كو ل ده‌ڤه‌را كواشێ و ده‌ورۆبه‌ر دژین).
