باژێرڤانیا شێخان دێ كار لسەر چێكرنا جاددە و زێدەكرنا ریێژا كەسكاتیێ كەت



قه‌زا شێخان ئێكه‌ ژ قه‌زایێن سه‌ر ب پارێزگه‌ها دهۆك و سالا ١٩٢٤ هاتیه‌ دامه‌زراندن، ب مه‌ره‌ما دابینكرنا خزمه‌تگۆزاریان هژماره‌كا فه‌رمانگه‌هان هاتینه‌ دامه‌زراندن، ژ وانان سه‌رۆكاتیا باژێرڤانیێ ل سالێن حه‌فتێیان، نوكه‌ قه‌زا شێخان پێدڤى ب زێده‌كرنا رێژا كه‌سكاتیێ و جاددە و چەندین خزمەتگۆزارییێن جودایه‌.

خالد نەرمۆ، سەرۆکێ باژێرڤانیا شێخان گۆت: (شێخان هه‌تا بەری سالا ٢٠٠٣ ئانکو بەرا ژناڤچۆنا رژێما بەعس سەر ب حوکمەتا ناڤەندی بوو، بلێ پشتی رزگارکرنا عیراقێ شێخان ڤەگەریاڤە هەمبێزا کوردستانێ و نوكە ئێکە ژ باژێرڤانیێن سەر ب حوکمەتا هەرێمێ، کار و چالاکیێن خوە ئەنجام ددەت و خزمەتا هاولاتیان دکەت ب تایبه‌تى ژ روویێ درۆستكرنا جادده‌ و ئاڤرێژ و كاروبارێن دى).

زێده‌تر گۆت: (پرۆژەیێن هەری گرنگ کو د سالا بورى دا هاتیە ئەنجام دان نێزیکی سێ کیلۆمەترا ژ جادەیێن ناڤخۆه‌ی هاتنه‌ قێرکرن ب تایبەتی جادەیێن جوتساید، بەری نوكە ل سەر دەمێ رژێما بەعس قەزایەکا کوردستانی بوویە ب چ رەنگان پرۆژێن چێكرنا رێیا نەهاتینە ئەنجامدان و ب تمامی هاتبوو پشت گوه هاڤێتن، لەوما چ سیمایێن هەبوونا باژێرڤانیێ نەبوون، ژبەرڤێ سەرۆکاتیا باژیرڤانیا شێخان تەکەزی لسەر دروست کرنا جوتسایدێن ناڤخۆه‌ی كر، هەروەسان كار ل سەر رێیێن ناڤخۆه‌ی کرنە تاکو بشێن سیمایەکێ شارستانی ب شێخان بدەن).

سەرۆکێ باژێرڤانیا شێخان باس ل وان پرۆژێن خزمەتگۆزاری کر یێن ل شیخان دهێنە جێبەجێکرن و راگه‌هاند، تێچۆنێن وان ب پێشینا هەیڤانە و هندەک ژی ژلایێ بۆدجێن تایبەت ڤە دهێنە مەزاختن، هەلبەت ئەڤ یەک بەرا سەپاندنا دۆرپێچا ئابووری یا لسەر کوردستانێ و برینا بۆدجەیا هەرێمێ بو ژلایێ حکۆمەتا عیراقێ، ژبەرکو پشتی دۆرپێچا ئابووری یا لسەر کوردستانێ و هاتنا داعشێ ئەو پرۆژەیێن بچۆک یێن باژێرڤانیا شیخان ئەنجام دای هەر هەموو ل سەر بۆدجەیا باژێرڤانیێ بوونە و زێده‌تر گۆت: (هەر چەندە پێشینەیا هەیڤانە یا شێخان کێمە و ب تنێ ١٠ ملیۆن دینارن، به‌لێ پێشینە ل کارێن سەخبێریکرنێ دهیتە مەزاختن ب تایبەتى سەخبێریکرنا رێکێن ناڤخۆه‌ی هه‌تا دگەهیتە تێکەلەکرنا رێیێن وان تاخین ژ نوو دهێنە ئاڤاکرن، داكو وەلاتى توشی ئالۆزی و ئاستەنگان نەبن ب تایبەتى ل وەرزىێ زڤستانێ دا و بشێن خزمەتگۆزاریێن سەرەتایی بگەهینن ڤان تاخان).

لدور هژمارا ئاکنجیێن شێخان گوت: (هەژمارا ئاکنجیێن قەزا شیخان نێزیكَ ٣٥ هزار کەسایە، ئەڤه‌ ژبلی وان ئاوارەیێن قەستا شێخان كرى، دبیت ئەڤ هەژمار نێزیکی هەژمارا خەلکێ شێخان ب خوە بیت، لەورا ئێک ژ پرۆژەیێن گرنگ یێن ڤێ باژێرڤانیێ خزمەتکرنا ئاوارایە ژ لایێ راکرنا گلێشی ڤە).

خالد نه‌رموو سه‌رۆكێ باژێرڤانیا شێخان لدور وان خزمەت و پرۆژەیێن پێدڤی کو ڤەدیتن ژی بو هاتیە کرن و پێشکێشی لایەنێن پەیوەندیدار هاتیه‌كرن  و زێده‌تر گۆت: (باژێرڤانیا شێخان دێ زێده‌تر گرنگیێ ب پرۆژە گرێدایی دروست کرنا جادده‌یان یێن سه‌ره‌كى و نه‌ سه‌ره‌كى ده‌ت،  هه‌روه‌ها  پرۆژەیێن گرێدایی ئاڤ و سۆلیناڤە بۆ شێخان ب تایبەتی بو کیمکرنا زیانان ل دەمێ رابوونا له‌هیان، دنوكه‌ دا شێخان پیدڤی پارک و باخچەیێن زێدەترە، لەورا مە ڤەدیتن بۆ ڤێ چەندێ کریە و پێشکێشی لایەنێن پەیوەندیدار کریە داكو گرنگى پێ بهێته‌دان و ریێژا كەسكاتیىێ زیێدەبیت).

ژلایه‌كێ دنڤه‌، ئه‌ندازیار حه‌كیم ره‌مه‌زان، سه‌رۆكێ پشكا پارك و باخچه‌ ل رێڤه‌به‌ریا گشتى یا باژێرڤانیان ل پارێزگه‌ها دهۆك دیاركر، ئێك ژ پلانێن هه‌رى گرنگ یێن رێڤه‌به‌ریا گشتى یا باژێرڤانیان ل پارێزگه‌ها دهۆك زێده‌كرنا رێژا كه‌سكاتیێ یه‌ ب تایبه‌تى ل وان ده‌ڤه‌رێن زێده‌تر ده‌شت هه‌ى و گۆت: (قه‌زا شێخان ژى ئێكه‌ ژ وان قه‌زایێن پارێزگه‌ها دهۆك كو كار بۆ زێده‌كرنا رێژا كه‌سكاتیێ دهێته‌كرن، نوكه‌ ل شێخان 79 هزار و 410م2 كه‌سكاتیا ناڤا پارك و باخچه‌یان هه‌یه‌، چوار هزار و 618م2 ژى كه‌سكاتیێ دناڤا جادده‌یان هه‌یه‌، پلان هه‌یه‌ ئه‌ڤ رێژه‌ زێده‌تر بكه‌ین هه‌ر چ نه‌بیت بۆ نێزیكێ 15%).