رێژا جوداكرنا گلێشی ل كواشێ‌ ب رێژا 500% زێده‌بوویه‌




د هه‌یڤه‌كێ‌ دا 60 ته‌نێن بۆتلێن ئاڤێ‌ و پتری 250 ته‌نێن كارتونان و 50 ته‌نێن نایلونێ‌ ره‌ش و 19 ته‌نێن سندوقا هاتنه‌ جوداكرن


پتری نه‌ه سالایه‌ كارگه‌ها جوداكرنا گلێشی ل ناوچه‌یا كواشێ‌ یا سه‌ر ب قه‌زا سێمێلێ‌ هاتیه‌ دامه‌زراندن، ل ده‌ستپێكێ‌ كارگه‌هه‌كا ب تنێ‌ بوو، به‌لێ‌ نوكه‌ بوویه‌ دو كارگه‌ه و رۆژانه‌ رێژه‌یه‌كا زۆرا گلێشی دهێته‌ ژێك جوداكرن.
ئه‌ندازیار دیار سادق سه‌عید، رێڤه‌به‌رێ‌ كارگه‌ها كواشێ‌ یا جوداكرنا گلێشی ب وه‌كاله‌ت گۆت: (ب مه‌ره‌ما باشتركرنا به‌رهه‌مێ‌ كارگه‌ها كواشێ‌ و كێمكرنا زیانێنته‌ندروستی ل سه‌ر وه‌لاتیان و ویێن ژینگه‌هی ل لكومه‌لگه‌ها كواشێ‌ ، دیسان ب مه‌ره‌ما ئه‌نجامدانا چه‌ند گورانكارییه‌كێن نوو، بۆ ده‌ما هه‌یڤه‌كێ‌ وه‌كو رێڤه‌به‌رێ‌ كارگه‌هێ‌ ده‌ستبكاربووم، ل ده‌ستپێكێ‌ ژی مه‌ گورانكاری ل هه‌یكه‌لێ‌ كارگێریێ‌ رێڤه‌به‌رێ‌ كرن، مه‌ سیسته‌مێ‌ به‌سمه‌ و په‌نجه‌مور بۆ رێكخستنا كاری و ده‌واما فه‌رمانبه‌ران دانا داكو ب ره‌نگه‌كێ‌ باشتر فه‌رمانبه‌ر پێگیریێ‌ ب ده‌وامێ‌ بكه‌ن، ئه‌ڤ یه‌ك بوویه‌ ئه‌گه‌ر كو رێژا هاتنا فه‌رمانبه‌ران بۆ سه‌ر كاری ب ره‌نگه‌كێ‌ به‌رچاڤ زێده‌بیت).
زێده‌تر گۆت: (پێشتر تنێ‌ ئێك كارگه‌ه بوو، به‌لێ‌ پاشی كارگه‌هه‌كا دی هاته‌ دروستكرن و بوونه‌ دو كارگه‌ه، به‌ری گورانكاری بهێنه‌كرن هه‌ردو كارگه‌ه ژ كاركه‌فتی بوون، مه‌ هه‌ردوو دانه‌كاری و رێكخستنه‌كا باشتر ئێكخسته‌ كارێ‌ وان، ڤێ‌ یه‌كێ‌ كارتێكرنه‌كا ئه‌رێنی ل سه‌ر زێده‌كرنا به‌رهه‌مێ‌ كارگه‌هێ‌ كر، ژ به‌ر كو كارگه‌ه هاتنه‌ دروستكرن ڤه‌ و فه‌رمانبه‌ران ژی ب شێوازه‌كێ‌ باشتر ده‌ست ب كارێ‌ خوه‌ كره‌ڤه‌، به‌ری نوكه‌ كارگه‌هێ‌ ب تنێ‌ پێنج ده‌مژمێرا كاردكر، به‌لێ‌ مه‌ كره‌ هه‌شت ده‌مژمێر د رۆژێ‌ دا، ب ڤێ‌ یه‌كێ‌ ژی رێژه‌یه‌كا كێمتر یا گلێشی هاته‌ بن ئاخكرن و هاڤێتن، ئه‌ڤه‌ دده‌مه‌كێ‌ دایه‌ كو به‌ری نوكه‌ رێژه‌یه‌كا زۆرا گلێشی دهاته‌ بن ئاخكرن و زیان ب داهاتێ‌ حوكمه‌ت و ژینگه‌هێ‌ ژی دگه‌هاند).
ناڤبری دیاركر ژی، پێشتر شێفته‌كێ‌ كارگه‌هێ‌ ب شه‌ڤ كاردكر، به‌لێ‌ د نوكه‌ دا شێفتێ‌ شه‌ڤێ‌ هاته‌ راگرتن و زێده‌تر گۆت: (راگرتنا شێفتێ‌ شه‌ڤێ‌ بوویه‌ ئه‌گه‌ر داهاته‌كێ‌ باشتر بۆ حوكمه‌تێ‌ بزڤریت، چونكو ب شه‌ڤ هنده‌ك جاران كاره‌با نیشتمانی نه‌بوو و ماولیده‌یان كاردكر و ب ڤێ‌ یه‌كێ‌ رێژه‌یه‌كا زۆرا گازوایلێ‌ دهاته‌ سوتن و نوكه‌ ئه‌و گاز هه‌موو زڤری ڤه‌، دیسان مه‌ ئه‌ركێ‌ شه‌ڤێ‌ زێده‌تر كره‌ سه‌خبێری و پاقژكرن دا كو ب رۆژ بێ‌ ئاریشه‌ كار بهێته‌كرن و مفا ژ ده‌می بهێته‌ وه‌رگرتن، دیسان تیمه‌كا 15 كه‌سی یا پێكهاتی ژ ئه‌ندازیار و كرێكار و چه‌ند شوفێران ل سه‌ر ئامیرێن كاری هاته‌ پێكئینان، دا كو ب شێوازه‌كێ‌ باشتر و زانستیانه‌ گلێشێ‌ زێده‌ و ئه‌وێ‌ نه‌هێته‌ جوداكرن بهێته‌ بن ئاخ كرن، ب ڤێ‌ یه‌كێ‌ هند پاراستنێ‌ ل سه‌ر ژینگه‌هێ‌ بكه‌ت، هند ژی گلێشی ژ سۆتنێ‌ ب پارێزن و ژ دووكێل و ژه‌هراویێ‌ بهێنه‌ پاراستن، سوپاس بۆ خودێ‌ د ده‌ما نێزیكێ‌ هه‌یڤه‌كێ‌ دا ب تنێ‌ روودانه‌كا ئاگری یا مه‌زن دروست بوو، به‌لێ‌ ئه‌و ئاگر ژی ژلایێ‌ تیمێن مه‌ ڤه‌بزویترین ده‌م ڤه‌ هاته‌ كونترۆلكرن).
ئه‌ندازیار دیار صادق سه‌عید، رێڤه‌به‌رێ‌ كارگه‌ها كواشێ‌ یا جوداكرنا گلێشی ب وه‌كاله‌ت د درێژاهیا ئاخفتنێن خودا دیاركر ژی، وان پلانه‌كا باش بۆ كارگه‌ها جوداكرنا گلێشی ل كواشێ‌ دانایه‌ دا كو داهاتێ‌ بۆ حوكمه‌تێ‌ دهێت ب ره‌نگه‌كێ‌ باشتر زێده‌ بیت و مه‌زاختن ژی زۆر كێمتر بن و زێده‌تر گۆت: (پشتی هژماره‌كا گورانكاریان رێژا جوداكرنا گلێشی ب رێژا بۆ رێژا 500% زێده‌بوویه‌، زیده‌باری پاراستنا ته‌ندروستی یا مروڤان وپارستنا ژینگه‌هێ‌ ئه‌ڤ یه‌ك ژی ئارمانجا كارگه‌هێ‌ یه‌، به‌ری نوكه‌ كارگه‌هه‌كێ‌ بۆ حوكمه‌تێ‌ كاردكر و ئێك ژی بۆ به‌لێنده‌ری دچوو، به‌لێ‌ نوكه‌ داهاتێ‌ هه‌ردو كارگه‌هان بۆ حوكمه‌تێ‌ دچیت، ئه‌ڤ یه‌ك ژی زۆر گرنگه‌، ئه‌و ده‌ما ئه‌م ل كارگه‌هێ‌ 16 ته‌نێن ئه‌له‌منیوم، 60 ته‌نێن بتلێن ئاڤێ‌، 50 ته‌نێن ماددێ‌ pp ، دیسان 65 ته‌نێن ئاسنی، پتری 250 ته‌نێن كارتونان، 20 ته‌نێن نایلونێ‌ جوراوجۆ و 50 ته‌نێن نایلونێ‌ ره‌ش، دیسان 19 ته‌نێن سندوقا هاتنه‌ جوداكرن ئه‌ڤ رێژه‌ و داتایه‌ بۆ ڤی ماوه‌یی د زۆرن، د پلانا كارگه‌هێ‌ دایه‌ ل سه‌ر ڤێ‌ یه‌كێ‌ به‌رده‌وام بیت دا كو باشترین مفا و كێمترین زیان هه‌بیت، ئه‌ڤ هه‌موو كه‌رسته‌ چه‌ند رۆژێن بهێت دێ‌ د سه‌رێك زێده‌كرنه‌كا ئاشكرا هێنه‌ فروتن و بیته‌ داهات بۆ حوكمه‌تا هه‌رێما كوردستانێ‌).
كارگه‌ها جوداكرنا گلێشی ل كواشێ‌ دكه‌ڤیته‌ نێزیك گوندێ‌ كواشێ‌، جهه‌كێ‌ دووره‌ ده‌سته‌، رێڤه‌به‌ریا كارگه‌هێ‌ پلان و كار بۆ وێ‌ یه‌كێ‌ هه‌یه‌ كو چو زیان ل سه‌ر روونشتڤانێن كواشێ‌ و ده‌وروبه‌ر نه‌كه‌ت، دیسان چو كارتێكرن ل سه‌ر پیسبوونا ژینگه‌هێ‌ ژی نه‌هێته‌كرن.
ئه‌ندازیاری دیاركر ژی، به‌ری نوكه‌ گه‌له‌ك گرنگی ب كوالێتیا جوداكرنا گلێشی نه‌ دهاته‌دان، به‌لێ‌ نوكه‌ جوداكرنا ماددێن گلێشی د چه‌ندین فلته‌ران دا بوریت و زێده‌تر گۆت: (خه‌لكێ‌ مه‌ ب تایبه‌تی ئه‌و كومپانی و كه‌سانێن كو دخوازن كه‌ رسته‌ و به‌رهه‌مێن جوداكری بكرن دشێن ژ نێزیك سه‌ره‌دانا كارگه‌هێ‌ بكه‌ن و كوالێتیا به‌رهه‌مان ب چاڤێ‌ خوه‌ ببینن، هه‌ردیسان مه‌ كار ل سه‌ر جوداكرنا هه‌موو وان كه‌سان ژی كر ئه‌ڤێن كو دكارگه‌هێ‌ دا كار دكه‌ن هه‌ر ژ رێڤه‌به‌ری هه‌تا كرێكاری، گرینگی دان ب جل وبه‌رگێن سه‌لامه‌تیێ‌ هه‌ر ئێك ژ وان كه‌سێن وه‌كو ئه‌ندازیار، كرێكار، شوفێر كاردكه‌ن جلوبه‌رگێ‌ تایبه‌ت بیت دا كو ئه‌ڤ یه‌ك ببیته‌ ئه‌گه‌رپاراستنا گیانێ‌ وان, هه‌ر ئێك كارێ‌ خوه‌ بزانیت و ب ساناهیتر ژێك بهێته‌ نیاسین ب تایبه‌تی بۆ وان كه‌سانێن سه‌ره‌دانا كارگه‌هێ‌ دكه‌ن).
ناڤبری دیاركر ژی، ژبلی گورانكاریێن ناڤا كارگه‌هێ‌، هه‌ڤده‌م وان كار ل سه‌ر نووژه‌نكرنا ئامیرێن كارگه‌هێ‌ ژی كریه‌ و ل دووماهیێ‌ گۆت ژی: (هه‌موو ئه‌و ئامیرێن ژكاركه‌فتی، جاره‌كا دی هاتنه‌ دروستكرن ڤه‌، مینا حه‌فاره‌ و شوفه‌ل، دیسان هژماره‌كا تایران بۆ ئامیران هاتنه‌ كرین، دیسان چه‌ندین سه‌خبێریێن بچووك و مه‌زن بۆ كارگه‌ه و ئامیرێن وێ‌ هاتنه‌كرن دا كو كار ب شێوازه‌كێ‌ باشتر ب رێڤه‌بچیت).
ژبلی كارگه‌ها جوداكرنا گلێشی ل كواشێ‌، هه‌ڤده‌م هژماره‌كا زۆرا كارگه‌ه و كومپانی و پازرینگه‌هێن په‌ترۆلێ‌ و جوراوجۆ ل كواشێ‌ هه‌نه‌، به‌لێ‌ وه‌كو پێدڤی رێكخستن بۆ نه‌هاتیه‌كرن ب تایبه‌تی پارزینگه‌هێن په‌ترۆلێ‌، پێشتر فه‌رمانگه‌ها ژینگه‌ها دهۆكێ‌ بۆ ئه‌ڤرۆ دیاركر بوو، ژ ئه‌گه‌رێ‌ پابه‌ندنه‌بوون ب رێنمایێن ژینگه‌هێ‌ هژماره‌كا ژ پازرینگه‌هێن كواشێ‌ هاتبونه‌ سزادان، ب گوره‌ی پێزانینێن فه‌رمانگه‌ها ژینگه‌ها دهۆك، كارگه‌ه و پازرینگه‌هێن په‌ترۆلێ‌ ل كواشێ‌ دڤێت 21 مه‌رجان بجه بكه‌ن هه‌تا موله‌تا كاركرنێ‌ ب وان دهێته‌دان.