وه‌زیرێ شاره‌وانى: هه‌ر فه‌رمانبه‌رێ ده‌مێ ب رێڤه‌برنا مامه‌لا تشته‌كێ وه‌ربگریت دێ پێرابوونێن قانونى به‌رامبه‌ر هێنه‌ وه‌رگرتن




وه‌زیرێ شاره‌وانى و گه‌شتوگۆزار یا حوكمه‌تا هه‌رێما كوردستانێ دچارچوڤێ كومبوونه‌كێ ل رێڤه‌به‌ریا گشتى یا باژێرڤانیان ل پارێزگه‌ها هه‌ولێر دیاركر كو هه‌ر فه‌رمانبه‌ره‌كێ ده‌مێ ب رێڤه‌برنا مامه‌لێن وه‌لاتیان تشته‌كێ وه‌كو ده‌ستكه‌فت وه‌ربگریت دێ پێرابوونێن قانونى به‌رامبه‌ر هێنه‌وه‌رگرتن، حوكمه‌ت دخوازیت زێده‌تر خزمه‌تا وه‌لاتیان بكه‌ت.

ب گوره‌ى راگه‌هانده‌كا وه‌زاره‌تا شاره‌وانى و گه‌شتوگۆزار، كو رۆژا 7ێ چریا دویێ 2019 ده‌رچویه‌، ساسان عه‌ونى وه‌زیرێ شاره‌وانى و گه‌شتوگۆزار یا حوكمه‌تا هه‌رێما كوردستانێ د سه‌ره‌دانه‌كێ دا بۆ رێڤه‌به‌ریا گشتى یا باژێرڤانیان ل هه‌ولێرێ دیاركر كو دامه‌زراوه‌یێن باژێرڤانیان ب ره‌نگه‌كێ گشتى، به‌رده‌وام كار و په‌یوه‌ندیه‌كا باش ل گه‌ل خه‌لكى هه‌یه‌ و زێده‌تر گۆت: (هه‌ر خه‌مساریه‌ك دبیته‌ ئه‌گه‌رێ درۆستبوونا نه‌رازیبوونا وه‌لاتیان و دخوازین كو زێده‌تر خزمه‌تا وه‌لاتیان بهێته‌كرن، كاروبارێن ژ هه‌ژى بهێنه‌كرن).

ناڤبرى ل بارا كارناما كابینا نوو یا حوكمه‌تا هه‌رێما كوردستانێ ژى دیاركر كو حوكمه‌تا هه‌رێما كوردستانێ دخوازیت ب رێیا ئه‌نجامدانا خزمه‌تگوزاریان ل هه‌موو ده‌ڤه‌ران زێده‌تر خزمه‌تا وه‌لاتیان بكه‌ت و زێده‌تر گۆت: (هه‌ر فه‌رمانبه‌ره‌كێ به‌رامبه‌ر ب رێڤه‌برنا مامه‌لێن وه‌لاتیان تشته‌كێ وه‌كو ده‌ستكه‌فته‌كێ یان كاره‌كێ نه‌قانونى بكه‌ت، دێ توشى پێرابوونێن دژوار بیت و ئه‌ڤ یه‌ك هێلا سووره‌، دیسان نابیت چاڤنقاندن ل زێده‌گاڤیان بهێته‌كرن و نابیت فه‌رمانبه‌ر چاره‌نڤیسێ كارێ خوه‌ بكه‌ت قوربانى، نابیت بكه‌ڤنه‌ بن گڤاشتنێن چوو كه‌س و لایه‌نان، ژبه‌ركو كارێ باژێرڤانیان خزمه‌تكرنا وه‌لاتیانه‌ و پێدڤى یه‌ ب گوره‌ى قانون و رێنمایان بیت"