به‌رپرسێ پشكا كاروبارێن قانوونی ل رێڤه‌به‌ریا گشتیا باژێرڤانیان ل
دهۆكێ راگه‌هاند، ل سنووری هه‌ر 47 باژێرڤانیان نێزیكی 17500 زێده‌گاڤیان هه‌نه،
ل سالا بۆری قانوونه‌كا تایبه‌ت ده‌ركه‌تیه هه‌موو خال تێدانه ژ وانا نابیت ب
هیچ ره‌نگه‌كی عه‌ردێ چاندنێ یان هه‌ر ئه‌رده‌ك بێی یێ مۆله‌تا ئاڤاكرنێ كار
تێدا بهێته كرن و هه‌ر زێده‌گاڤیه‌كا بهێته كرن دڤێت ئێكسه‌ر بهێته راكرن و
گۆت: ژ ڤێ سالێ هه‌تا 2019 مه ڤالاتیه‌كا قانوونی یا هه‌ی بۆ تۆماركرنا زێده‌گاڤیان،
به‌لێ ب خوشحالیڤه ل ڤێ دووماهیێ ره‌شنڤیسه‌ك ژ لایێ ئه‌نجوومه‌نی وه‌زیران و
وه‌زاره‌تا باژێرڤانیێ ڤه هاتیه بلند كرن بۆ په‌رله‌مانی.
نوبه‌دار سامی عه‌بدوللا، به‌رپرسێ پشكا كاروبارێن قانوونی ل رێڤه‌به‌ریا
گشتیا باژێرڤانیان ل دهۆكێ دیار كر، رێڤه‌به‌ریا مه ژ 47 باژێرڤانیا پێكدهێت و ل
دووڤ قانوونا رێڤه‌برنا باژێرڤانیا دچین یا ژماره شه‌ش یا سالا 1993 كو سێ جاران
راستڤه‌كرن ل سه‌ر هاتیه‌كرن ل سالا 1997 و 1998 و 1999 و گۆت: ل سنووری هه‌ر 47
باژێرڤانیا وان نێزیكی 17500 زێده‌گاڤیان هه‌نه، زۆربه‌یا وان ژی پشتی سالا 2000
هاتینه كرن، ئانكو ژ ڤێ سالێ هه‌تا 2019 مه ڤالاتیه‌كا قانوونی یا هه‌ی بۆ
تۆماركرنا وان، به‌لێ ب خوشحالیڤه ل ڤێ دووماهیێ ره‌شنڤیسه‌ك ژ لایێ ئه‌نجوومه‌نی
وه‌زیران و وه‌زاره‌تا باژێرڤانیێ ڤه هاتیه بلند كرن بۆ په‌رله‌مانی و گه‌نگه‌شه
ل سه‌ر هاتیه كرن و ل دووڤ پێزانینان خواندنا ئێكێ یا بۆ هاتیه كرن دا كو
قانوونه‌كا تایبه‌ت ده‌ركه‌ن بۆ تاپۆكرنا وان زێده‌گاڤیان، ئه‌م چاڤه‌رێنه و گه‌له‌ك
ب هیڤینه دێ ئه‌ڤ قانوونه د به‌رژه‌وه‌ندیا وه‌لاتیان دا بیت.
ناڤهاتی زێده‌تر گۆت: ل هه‌یڤا دوویا سالا 2018 قانوونا ژماره سێ یا
نه‌هێلان و راكرنا زێده‌گاڤیان ل سه‌ر ئه‌ردێ حوكمه‌تێ ده‌ركه‌ت، وه‌كو
باژێرڤانی ئه‌و پێخوش بوون ب ڤێ قانوونێ، چونكۆ دشێین ل دووڤ قانوونێ سه‌ره‌ده‌ریێ
بكه‌ین، هینگێ وه‌سا نه‌بوو و چو قانوونێن تایبه‌ت ب زێده‌گاڤیان نه‌بوون و ب تنێ
پشتبه‌ستن ل دووڤ قانوونا سزایێن عیراقی یا سالا 1969 كر یا گشتی بوو، نوكه ئه‌ڤ
قانوونه یا تایبه‌ته و هه‌موو خال تێدانه ژ وانا نابیت ب هیچ ره‌نگه‌كی ئه‌ردێ
چاندنێ یان یێ به‌ری بهێته ئاڤاكرن بێ مۆله‌تا ئاڤاكرنێ و هه‌ر كه‌سێ زێده‌گاڤیێ
دكه‌ت دێ پێرابوونێن توند دژی وی هێنه وه‌رگرتن.
گۆت ژی: هه‌تا نوكه ل سنوری باژێرڤانیه‌كا وان ل ده‌وروبه‌را دو حاله‌ت
هه‌بووینه و هاتینه ده‌سته‌سه‌ركرن و نه‌هاتینه ئازاد كرن هه‌تا زێده‌گاڤیێن
خوه راكرین و ئه‌گه‌ر هات و دووباره كر دێ سزایێ وی توندتر لێ هێت مینا
سزاكرن یان زیندانكرن.
نوبه‌داری ئاشكرا كر ژی كو مخابن ل سه‌نته‌رێ پارێزگه‌ها دهۆكێ 7000
زێده‌گاڤی هه‌نه، پشتی ئه‌ڤ قانوونه ده‌ركه‌تی رێكخستن په‌یدا بوویه و هه‌ر
زێده‌گاڤیه‌كا ل پشتی مێژوویا 18 هه‌یڤا دوو یا سالا 2018 بهێته كرن دڤێت بهێته
راكرن و ئه‌گه‌ر نه هێته راكرن ئه‌و لژنا ل وێ ده‌ڤه‌رێ به‌رپرسیاره و دڤێت
پێرابوون دژی وان بهێنه وه‌رگرتن.
ل دۆر ئه‌و ئه‌ردێن ل سه‌ر ناڤێ باژێرڤانیێ نوبه‌دار دبێژیت: ئه‌و
دده‌نه ب كرێ بۆ مه‌ره‌مێن جوراوجور ل دووڤ پێدڤیێن ده‌ڤه‌رێ و نابیت ب ده‌نه
ب كرێ بێ سه‌رێك زێده‌كرنا ئاشكرا چونكۆ عه‌رد هه‌بووینه ژی بێ سه‌رك زێده‌كرن
داینه ب كرێ ئه‌ڤه ژی دژی قانوونێ یه و دبیت د ماوێ چوویی دا هنده‌ك حاله‌تێن
ب ڤی ره‌نگی روودابن، به‌لێ ل رێڤه‌به‌ریا وان ئه‌ڤ چه‌نده روونه‌دایه.
گۆت ژی: هنده‌ك مولك وان هه‌نه پێتڤیه بده‌نه ب كرێ بۆ نموونه
هنده‌ك دوكانن یێن باژێرڤانیێ نه و یێن ئاڤاكرین باژێرڤانی سالانه ده‌ته ب كرێ
و هنده‌ك ژی هه‌نه وه‌كو گۆره‌پان بۆ نموونه كه‌سه‌ك دێ سرامیكی یان مه‌رمه‌ری
دانیت بۆ ماوێ سێ سالان ئه‌ڤانه باژێرڤانی سه‌ره‌ده‌ریێ ل گه‌ل دا دكه‌ت ل
دووڤ قانوونا ژماره 32 یا سالا 1986 و ب رێكا سه‌رێكزێده‌كرنه‌كا ئاشكرا، به‌لێ
ب مه‌رجه‌كی هه‌ر باژێرڤانی سه‌رپه‌رشتیێ بكه‌ت و ب وێ مه‌زاختنا ئه‌و ل سه‌ر
رازی بن، دا كو نه‌بیته به‌ره‌لایی.
به‌رپرسێ پشكا كاروبارێن قانوونی ل رێڤه‌به‌ریا گشتیا باژێرڤانیان ل
دهۆكێ دیار كر ژی كو دو جۆرێن ده‌ڤه‌رێن پێشه‌سازی هه‌نه یێ ئێكێ ئه‌رده یێ
پیس مینا ئه‌ڤ دوكانێن دووكێل و گاز ژێ ده‌ردكه‌ڤن و یێ دویێ ژی یێن پیشه‌ینه
كو مخابن چو قانوون پێ نینه ب تنێ بریاره‌ك هه‌یه یا سالا 1990 یا ژماره 64
سه‌ره‌ده‌ریێ دگه‌ل دكه‌ین، دیسان ده‌ڤه‌را كاشێ و كارگه‌هێن مه‌زن یێن ئاسنی و
ئه‌له‌منیومی ئه‌ڤانه قانوونا خوه یا تایبه‌ت هه‌یه یا ژماره 25 یا سالا 1990
و سه‌رێك زێده‌كرن پێ نه‌ڤێت، چونكۆ هه‌موو كه‌س نه‌شێن ڤی كاری بكه‌ن و مووله‌تا
گه‌شه‌پێدانا پێشه‌سازی ژ وه‌زاره‌تێ پێ دهێته‌دان و باژێرڤانی دڤێت ئه‌ردی بۆ
دابین بكه‌ت به‌رامبه‌ری كریا سالانه، ل ڤێ دووماهیێ قانوونه‌كا دیتر ده‌ركه‌تیه
یا ژماره 20 یا سالا 1998 ئه‌ڤانه وه‌كو كارگه‌ه ماوێ وان ڤه‌كریه و دێ تێدا
كار كه‌ن هندی وان بڤێت.
